Marcus Rashford zhvilloi ndeshjen e tij të parë me fanellën e Barcelonës këtë fundjavë në miqësoren ndaj Vissel Kobe, por ajo që duhej të ishte një debutim i qetë, përfundoi me një episod të pazakontë – u zëvendësua vetëm 30 minuta pasi hyri në fushë.
Sulmuesi anglez, i huazuar për një sezon nga Manchester United me një opsion blerjeje prej 26 milionë paund, u aktivizua në pjesën e dytë, në një ndeshje që u zhvillua në Japoni si pjesë e turneut parasezonal të katalanasve.
Rashford u pa aktiv dhe dha sinjale pozitive, madje kontribuoi në golin e dytë të Barçës me një pasim të saktë për Lewandowskin, që më pas asistoi për talentin Roony Bardghji.
Por vetëm pak sekonda më vonë, trajneri Hansi Flick vendosi ta largonte nga loja, bashkë me mbrojtësin Jofre Torrents, duke nxjerrë në fushë dy të rinj: Gerard Martin dhe Pedro Fernandez (i cili shënoi edhe golin e tretë).
Pas ndeshjes, Flick u pyet për vendimin e tij të çuditshëm dhe tha:
“Ishte një plan i bërë që më parë. Donim të testonim disa skema me të rinjtë tanë dhe Rashford e Torrents e dinin që do luanin vetëm 30 minuta. Nuk kishte asnjë lidhje me performancën e tyre.”
Megjithatë, mediat spanjolle e quajtën zëvendësimin e Rashford si një “poshtërim klasik”, duke theksuar se një aktivizim i pjesshëm dhe më pas zëvendësimi është shpesh sinjal negativ në futboll.
Barcelona ka lëshuar një deklaratë të shkurtër ku thekson se nuk ka asnjë problem me Rashford dhe se ai do të jetë pjesë e rëndësishme e skuadrës gjatë sezonit.
Për Rashford, që po kërkon një rilindje larg Old Traffordit, mbetet për t’u parë nëse ky episod do të mbetet vetëm një keqkuptim taktik – apo sinjal i hershëm se nuk do ta ketë të lehtë në “Camp Nou”.
