Barcelona po përpiqet të krijojë hapësirë në kufirin e pagave për të regjistruar afrimet e reja para nisjes së sezonit të ri në La Liga, me më pak se dy javë deri te ndeshja e parë kundër Mallorcës. Deri tani, emra si Marcus Rashford dhe Joan Garcia mbeten të paregjistruar.
Klubi katalanas është optimist se do të mund të regjistrojë të gjitha përforcimet, përfshirë edhe Roony Bardghji nga Barça Atletic, por historia e viteve të fundit tregon se situata nuk është gjithmonë kaq e thjeshtë.
Për këtë arsye, largimet janë të nevojshme. Një nga kandidatët për t’u larguar është Hector Fort.
Paris FC interes për Fort-in
Sipas raportimeve nga L’Equipe, klubi francez Paris FC ka pyetur për transferimin e mbrojtësit 18-vjeçar Hector Fort. Fillimisht ata janë duke u përpjekur të arrijnë marrëveshje me Hamari Traore të Real Sociedad, por nëse ajo dështon, do t’i drejtohen Barcelonës për Fort-in.
Barcelona e hapur për shitje
Deri para pak ditësh, nuk kishte shumë zëra për largimin e Fort-it, por për shkak të situatës financiare, Barcelona është më e prirur për një shitje sesa një huazim. Sipas mediave spanjolle, Hansi Flick nuk e ka parë Fort-in si pjesë të rëndësishme të planeve të tij për sezonin e ri.
Edhe pse lojtari ka shprehur dëshirën për të luftuar për një vend në ekip, konkurrenca është e fortë me Jules Kounde si titullar dhe Eric Garcia që ka bindur në fundin e sezonit të kaluar.
Fort mund të jetë një tjetër emër i ri që largohet nga Camp Nou, për t’i dhënë Barcelonës hapësirë të nevojshme për të regjistruar yjet e rinj.
