Juventusi ende nuk është liruar nga Arthur Melo, mesfushori brazilian që prej kohësh kërkohet të largohet nga Torino, dhe tani duket se Besiktas ka shfaqur interesin e fundit për të marrë lojtarin.
Arthur erdhi në Juventus në vitin 2020 si pjesë e një marrëveshjeje shkëmbimi me Miralem Pjanic, por nuk arriti të lërë gjurmë në fanellën bardhezi. Me vetëm një gol dhe një asist në 63 paraqitje zyrtare, ai u huazua disa herë te klube si Liverpool, Fiorentina dhe Girona, por askush nuk pranoi ta blinte në mënyrë të përhershme.
Pavarësisht dëshirës për ta larguar, kontrata e tij me Juventusin vazhdon deri në qershor 2027, dhe paga e tij e lartë mbetet një barrë e madhe për klubin italian.
Sipas kolegut nga Sportitalia, Gianluigi Longari, tani në skenë ka hyrë Besiktas, i cili është duke vëzhguar situatën, si dhe disa klube spanjolle që kanë bërë pyetje për Arthurin. Ende nuk ka oferta konkrete, por është një shenjë pozitive për mesfushorin 29-vjeçar që kërkon një rikthim në fushë pas 15 paraqitjeve në LaLiga me Gironën sezonin e kaluar.
Nëse Besiktas apo ndonjë klub tjetër do të ndërmarrë një hap serioz, kjo do të mundësojë përfundimin e një kapitulli të gjatë e të komplikuar për Arthurin në Juventus.
