Me largimin e Luis Diaz drejt Bayern Munich për një shumë prej rreth 75 milionë euro, Liverpool humbi një prej sulmuesve më të vlefshëm të viteve të fundit. Kolumbiani ishte kyç në sukseset e ekipit, përfshirë dhe titullin e Premier League sezonin e kaluar, ku spikati si në krahë ashtu edhe në rolin e sulmuesit qendror.
Por ajo që pak e kujtojnë është mënyra si Diaz mbërriti në Anfield. Në janar 2022, kur dukej se ai ishte afër Tottenham, Liverpool u përfshi në garë në momentin e fundit dhe arriti të finalizonte marrëveshjen me të njëjtin çmim. Ajo lëvizje “rastësore” rezultoi një sukses i madh — dhe tani, skenari mund të përsëritet.
Një tjetër rast si ai i Diaz?
Liverpool duket se po monitoron nga afër situatën e Rodrygo Goes, yllit brazilian të Real Madrid. Klubi ka qenë i interesuar për të prej kohësh — madje një përpjekje për ta afruar është bërë që kur ai ishte ende te Santos, por marrëveshja nuk u konkretizua dhe lojtari përfundoi në Madrid.
Sipas raportimeve, Rodrygo po humbet terren te Reali që nga ardhja e trajnerit të ri, Xabi Alonso. Në këto rrethana, e ardhmja e tij është e pasigurt dhe një largim gjatë këtij afati kalimtar nuk përjashtohet.
Aktualisht, vetëm Tottenham raportohet të jetë realisht në garë për firmën e brazilianit. Megjithatë, kjo mund të hapë një mundësi të ngjashme me atë të Luis Diaz për Liverpool: një klub tjetër ndërhyn, Liverpool “zgjohet” dhe bën lëvizjen e fundit.
Pengesa financiare dhe mundësia për një lëvizje të zgjuar
Një nga problemet kryesore është se Liverpool nuk mund të përballojë financiarisht të afrojë njëkohësisht si Rodrygo ashtu edhe Alexander Isak – një tjetër objektiv i klubit. Por nëse marrëveshja me Spurs dështon, ose nëse Reali është i gatshëm për kompromis, Liverpool mund të futet në skenë në momentin e duhur.
Në futboll, disa nga marrëveshjet më të mira nuk ndodhin domosdoshmërisht me planifikim të gjatë, por për shkak të momentit të duhur. Dhe Liverpool e ka treguar më parë se di të përfitojë nga rasti.
Nëse historia e Diaz përsëritet me Rodrygo, tifozët mund të presin me entuziazëm një tjetër “goditje të zgjuar” në merkato.
