Trajneri i Dynamo Dresden, Thomas Stamm, ka marrë një ndëshkim të pazakontë që me siguri do ta bënte Jose Mourinhon të ndjehej krenar. Gjatë një ndeshjeje miqësore kundër SV Ried në fillim të korrikut, ai u përjashtua për diçka që do ta quanim, më së shumti, një “gabim njerëzor”.
Trajneri 42-vjeçar protestoi ndaj arbitrit për disa faulle të përsëritura ndaj lojtarit të tij, Jonas Oehmichen. Në këtë moment, ai deklaron se ka hyrë “në fushë ndoshta gjysmë metri”. Por për arbitrin, kjo mjaftoi që ta ndëshkonte me karton të kuq, vetëm për shkak të hyrjes së paautorizuar në fushë.
Vendimi u prit me habi, si nga skuadra gjermane, ashtu edhe nga nikoqirët austriakë. Por situata u bë edhe më absurde kur DFB (Federata Gjermane e Futbollit) shpalli pezullimin zyrtar të trajnerit… për një incident që nuk ka ndodhur as në territorin gjerman.
Edhe më e çuditshme është se Thomas Stamm nuk është ndëshkuar kurrë më parë gjatë karrierës së tij dhe, megjithatë, do t’i duhet të mungojë në një ndeshje miqësore të ardhshme. Lajmi i mirë? Ai do të jetë i pranishëm në ndeshjen zyrtare të kampionatit kundër Fürth këtë të diel në orën 13:30.
Ky episod i çuditshëm, me një ndëshkim që vështirë se mund të justifikohet, duket si një skenar i marrë direkt nga repertori i Mourinho-s. Dhe edhe pse Special One mund të mos jetë duke ndjekur kampin stërvitor të Dresden, me shumë gjasë do të qeshte me këtë histori dhe do të ndiente njëfarë krenarie për një “koleg” që, edhe në një miqësore, diti të tërhiqte vëmendjen me stil.
Leave feedback about this