E ardhmja e Rasmus Hojlund ka ndezur skenën e merkatos europiane. Sulmuesi 22-vjeçar, i cili iu bashkua Manchester United nën drejtimin e Erik ten Hag, është kthyer në objekt dëshire për disa nga klubet më të mëdha në Evropë, pavarësisht se sezoni i tij debutues në Premier League nuk ishte aspak mbresëlënës – me vetëm katër gola të shënuar.
Sipas burimeve të “Caught Offside”, klube nga Italia dhe Gjermania janë vënë në lëvizje për të siguruar firmën e danezit. Edhe pse statistikat e tij nuk janë premtuese, mosha dhe potenciali i tij e bëjnë një investim tërheqës për shumë skuadra që fokusohen te zhvillimi i talenteve të rinj.
Një nga zhvillimet më interesante vjen nga Gjermania. Erik ten Hag, tani në krye të kampionëve të Bundesligës, Bayer Leverkusen, raportohet se po “shton presionin” për ta marrë përsëri nën drejtim Hojlundin. Holandezi, që e solli në “Old Trafford”, duket i bindur se mund ta zhvillojë më mirë në një ambient më të qetë dhe me një sistem më funksional në Gjermani.
Megjithatë, konkurrenca është e fortë edhe nga Serie A. Emra të mëdhenj si AC Milan, Napoli, Juventus dhe Inter Milan po monitorojnë nga afër situatën. Madje Interi ka bërë edhe një ofertë konkrete që përfshinte sulmuesin Joshua Zirkzee në një marrëveshje të kombinuar – por kjo u refuzua menjëherë nga “Djajtë e Kuq”.
Kjo refuzim tregon se Manchester United nuk është i etur ta shesë lojtarin. Klubi ka përcaktuar qartë se nuk do të pranojë huazime, shkëmbime lojtarësh apo ulje çmimi. Ata duan vetëm një marrëveshje të plotë dhe të drejtë. Nën drejtimin e trajnerit të ri, Ruben Amorim, United beson se Hojlund mund të zhvillohet dhe të shpërthejë nëse i jepet koha dhe mbështetja e duhur.
Nga këndvështrimi i tifozëve, shitja e tij tani do të ishte një gabim. Hojlund ka shfaqur shpërthime të talentit të tij dhe ka cilësi të rralla: shpejtësi, fizik dhe instinkt për gol. Në një skuadër që ka vuajtur nga mungesa e organizimit dhe qartësisë taktike, ai shpesh ka qenë viktimë e sistemit dhe jo problem vetë.
Gjithashtu, tifozët nuk e shohin me sy të mirë mundësinë për t’i dhënë një ndihmë Ten Hag-ut në rikonstruktimin e skuadrës së tij në Leverkusen, sidomos kur ai nuk arriti ta nxirrte në pah potencialin e Hojlundit gjatë kohës te United.
Në fund të ditës, zgjedhja mbetet te United. Por nëse historia ka treguar diçka, është që shitja e talenteve të reja shumë shpejt është kthyer shpesh në pendesë. Nëse Ruben Amorim e sheh potencialin te Hojlund, duhet t’i jepet një shans i vërtetë – sepse, me trajnerin e duhur, ky 22-vjeçar mund të shpërthejë dhe të bëhet lideri i sulmit për vitet që vijnë.
