Gianluigi Donnarumma, ylli i kombëtares italiane dhe portieri i Paris Saint-Germain, ka zgjedhur të qëndrojë në Francë, pavarësisht interesimit serioz nga Inter Milan. Sipas raportimeve të “Calciomercato”, portieri 26-vjeçar është i gatshëm të rinovojë kontratën e tij me kampionët francezë, e cila skadon në më pak se 12 muaj.
Për Interin, kjo është një goditje e vogël në planet afatgjata. “Nerazzurrët” po kërkojnë trashëgimtarin ideal për Yann Sommer, portierin zviceran që mund të largohet verën e ardhshme kur i përfundon kontrata. Edhe pse ata siguruan shërbimet e Josep Martinez nga Genoa, drejtuesit zikaltër ende janë në kërkim të një emri më të madh për ta bërë të vetin portën e San Siros.
Nga ana tjetër, PSG ka vonuar me nisjen e bisedimeve me Donnarummën, por tani është e përqendruar në mbajtjen e tij me çdo kusht. Burime të afërta me klubin francez theksojnë se ekziston optimizëm për arritjen e një marrëveshjeje të re shumë shpejt. Dhe ajo që i jep më shumë peshë situatës është vetë dëshira e Donnarummës për të vazhduar në “Parc des Princes”.
Kujtojmë se Donnarumma u bashkua me PSG në vitin 2021 pas një largimi të bujshëm nga AC Milan si lojtar i lirë. Prej atëherë, ai ka qenë pjesë kyçe e formacionit dhe tashmë është në kulmin e karrierës së tij.
Ndërkohë, Interi mbetet i kujdesshëm. Edhe pse nuk ka sinjale konkrete për një lëvizje të afërt, drejtuesit italianë do të vijojnë të monitorojnë situatën – sidomos nëse bisedimet për rinovim dështojnë ose zvarriten.
Nëse Donnarumma vendos të mos firmosë, Interi do të ketë një mundësi të artë për ta siguruar me parametra zero në verën e 2026. Por për momentin, duket se prioriteti i portierit italian është rinovimi me PSG-në.
